Atzo eguardian eman zuten hitzarmenaren berri Andoni Alvarez alkateak eta Marta Lasa zinegotziak Udal gobernua ordezkatuz, eta Pepe Iparragirre zinegotziak eta Teresa Santana zinegotzi ohiak Elkarrekin-Podemos ordezkatuz.
Bi aldeek adierazi zutenez, Andoain guztiontzat bizigarri izateko erronka, plan eta proiektu multzoa jasotzen dituzte 27.952145 eurotara iristen diren aurrekontuek.
Bestalde, gaineratu zuten aurreko urteko gerakinarekin ere kontatzen duela Udalak, “Herriaren etorkizunerako ezinbesteko ikusten diren eraikuntza eta proiektuak garatuko dira bertatik”.
Zerbitzu publikoen aldeko apustua
Aurrekontu hauen bidez udal zerbitzu publikoak sendotzeko apustua egiten dela azpimarratu zuten, “egonkortasun-prozesuen bidez lanpostuak egonkortu eta lan baldintzak hobetzen dira”.
Ildo beretik jo zuen Santanak aurkezpenean, eta bereziki eskola publikoaren aldeko aldarria egin du. Ziurtatu zuen Elkarrekin-Podemosek laguntza publiko guztiak eskola publikora bidera daitezen lan egiten segiko duela, “ez badugu haren aldeko erabateko erabakiak hartzen, gainbehera baitatorkigu”.
