Honatx, Bastero Kulturgunean egin zuen adierazpena:
"Gaurko herri bilera honetara hurbildu zareten andoaindar kopuru handia ikusi besterik ez dago gai honek duen garrantziaz jabetzeko. Ez da gutxiagorako. Herri baten eraikuntza inoiz amaitzen ez den lan bat da. Herrigintza, hain zuzen ere, horretan datza: herrian bizi garen heinean, herria eraikitzen eta hobetzen jardutea. Hamarkadak dira ordea, gure herriaren eraikuntza honetan muga edo oztopo handi bat badugula. N-1 errepidea, gure egunerokotasuna baldintzatu duen eta baldintzatzen duen azpiegitura da: Zarata, trafiko ilarak herrigunetik, istripuak, zarata gehiago eta kutsadura. Horrez gain, gure herria bertebratzeko, eta auzoen arteko arrakala handitu duen azpiegitura batean bilakatu da.
2011. urtean, A-15aren eraikuntzarekin, arazo horri behin-betiko konponbidea emateko aukerak baliatu beharrean, arazoan sakondu zen. Trafikoa biderkatu, eta gaizki amaitutako azpiegitura bat utzi ziguten. Horrek ekarri dituen arazo gehigarriekin.
Joan den agintaldian, Gipuzkoako Foru Aldundiaren eskutik, irtenbide bat proposatu zen. Bakarra zela esan ziguten, alternatibarik ez zegoela esan ziguten. Herritarren antolaketari esker, eztabaida soziala artikulatu zen, eta andoaindarrek gaiaren gainean lidergoa hartu zuten. Gure herriaren etorkizuna dago jokoan, gure egunerokotasuna, gure osasuna.
2023. urteko ekainean, alkate izendatu nindutenean, Andoainentzat eta andoaindarrentzat alternatibak eskaintzeko konpromisoa hartu nuen. Alderdi politiko guztiekin eta gaiarekin kezka agertu zuten Sorabilla Auzo elkartearekin eta Plastaformarekin mahai bat osatu genuen. Gure eskumena ez zela, eta erabakia guri ez zegokigula esan zitzaigun. Baina, marko konpetentzialetik harago, herri batean arazoa den gai guztien gaineko eskuhartzea hartu behar dela pentsatzen dut.
Gaur hemen, Andoaingo Udalaren ekimenez, N-1 eta A-15eko loturaren aferari irtenbide tekniko bar emateko eta Andoaingo herriaren garapenari aukera berriak ireki nahian aztertu ditugun alternatiben azterlana dakarkigu. Gure arduraren parte bat bete dugu.
Hemendik aurrera, andoaindarren txanda da. Gu guztiona. Aukerak aztertu, eztabaidan sakondu. Eta ahal den neurrian elkarguneak topatu. Ziur gaude, hemen gauden guztiok helburu bera dugula. Andoain hobeago bat, jasangarriagoa eta bizigarriagoa eraikitzen jarraitzea.
Bide batez, Gipuzkoako Foru Aldundiari elkarlanerako deia luzatu nahi diogu berriz ere. Behin betiko soluzioaren bila gabiltzan honetan, eskuz-esku lan egiteko unea da. Gipuzkoaren interesak eta andoaindarrenak bat egiteko unea da. Ziur gaude, borondatearekin elkarlanerako aukerak sortuko direla.
Gaur abiatzen dugun prozesua garrantzi handikoa izango da. Udazkenean iritzi bilketa masiborako ariketa egingo dugu, baina horretarako lehenik eta behin aukera ezberdinen sozializazio lana egin behar da, eta herritarrak gai honen inguruan iritzia eman ahal izateko beharrezkoa den informazioa helarazteko bitartekoak eskainiko ditugu, zalantzak argitzeko foroak, eta baita ere norberaren iritzia emateko espazioak ere.
Besterik gabe, Sestrak egindako lanaren aurkezpenarekin utziko zaituztet".