Patxi Bisquert zuzendari eta Joseba Usabiaga protagonista dituen Ombuaren Itzala filmak Pello Mari Otaño Zizurkilgo bertsolari handia du ardatz, eta XIX. mendearen amaierako Gipuzkoara garamatza.
Hark emigrazioa eta askatasunaren bila Euskal Herritik Argentinara abiatutako bidea kontatzen du filmak; hain zuzen, Ameriketako bizialdian, sustraiekiko lotura, herrimina eta nortasunaren bila aritzeko bertsolariaren beharra jartzen du agerian pelikulak, eta horretarako, Pampako lurraldearen ezaugarrietako bat den ombua zuhaitzaren sinbolismoaz baliatzen da.
Filma auzolanean sortutako proiektua da, eta besteak beste, La Salle Berrozpe Ikastetxearen laguntza ekonomikoa jaso du, hezkuntza, historia eta kultura uztartzen dituen ekimen baliotsu hau babesteko asmoz.
Zizurkilekin lotura berezia duen filma
Patxi Bisquert aktore eta zuzendari zizurkildarrak grinatsuki azken urtetan gauzatu duen proiektua da Ombuaren itzala filma. Egileak maiz adierazi izan duenez, egun, ahaztu samar dago Euskal Herrian ziurrenik izan den bertsolaririk jantziena, eta horrexegatik, premiazkoa ikusi du haren gaineko bizitzan oinarritutako filma errodatzea, eta horrekin, euskal kulturaren memoria historikoari bultzada ematea.
Bisquertek Zizurkilgo Atxulondo kultur etxean 2024ko apirilean, eman zituen urtetan buruan zebilkien proiektuaren gaineko azalpenak. Mintzaldia, ikusgai, hemen.
Zizurkilen, Errekalde baserrian jaio zen Pello Mari Otaño, eta hain justu, bertan eta herriko plazan grabatu zituzten filmaren hainbat eszena, errealismoa erantsiz pelikulari. Grabazio eguneko argazkiak eta bideoak, hemen.
Zizurkilen ez ezik, Nafarroan eta Argentinan errodatu zituzten beste hainbat eszena,
Azkenik, azaroaren 30ean, Zizurkilen, San Millan elizan egin zuten filmaren estreinaldia.