Sarrera doan da (zenbakituak), eta oraindik bakarren batzuk geratzen direla adierazi dute Basteron.
Maila handiko gonbidatu ugarirekin
“Gozagarria izango da Queen taldearen jarraitzaileentzat ez ezik, baita musika eta antzerkia zuzenean ikustea gogoko dutenentzat ere”, Emezabalek adierazi duenez.
Queen musika talde mitikoaren doinuak oinarri hartuta, show zirraragarria iragarri dute, eta horretarako, Musika Bandak gonbidatu ugari izango ditu bidaide.
Xanti Korkostegi aktore donostiarrak, Go!azen ETBko telesailean eta Julio Medem zine zuzendariaren 8 filmean parte hartu duen aktoreak egingo ditu ikuskizunaren aurkezpen lanak.
Jon Gurrutxaga Elgoibarko blusmana Freddie Mercuryren azalean jarriko da, eta Patxi Zabaleta musikaria ere oholtzan ariko da gitarra elektrikoa astinduz, talde britaniarreko kide izan zen Brian Mayren paperean.
Azkenik, Urnietako Lurdes Iriondo musika eskolako irakasle eta organo jole den Ana Belen Garcia andoaindarrak osatuko du gonbidatuen zerrenda.
Iazko abenduaren 15ean, Udal Musika Eskolako Bandak Basteron eman zuen kontzertua (argazkiak eta bideoak), hemen.