Lehengo eta behin, Jaime. Zer moduz zaude?
Ondo, itzultzeko gogoz. Aurreko ligamentu gurutzatua eta meniskoa hautsi nuen denboraldiaren hasieran. Minez hasi nuen denboraldia eta gogoan dut lesioa izan aurretik gorputzak abixu bat edo beste eman zidala. Zarautzen aurkako partidan, 4. minutuan, esprinta jo nuen norabidea aldatzeko eta une horretantxe hankaren kontrola guztiz galdu nuen.
Nolakoak izan ziren hurrengo minutuak?
Kontaktu handiko kirol jarduera da gurea eta ohituta gaude minarekin jokatzera. Argi sentitu nuen zerbait banuela baina partida garrantzi handikoa zen. Aldaketa gutxi genituen, gainera. Minutu batzuk igarota berriro atera nintzen kantxara eta segundu gutxi egin nituen jokoan. Belaunak ez zuen erantzuten.
Eta ondorengo minutuetan, zer?
Poliklinikara joan eta probak egin zizkidaten. Lesio larria konfirmatu besterik ez zen egin.
2024, bestalde, gogoan hartzeko urtea izan da Leizaran Ernio Inmobiliaria taldearentzat. Oso une bereziak bizi izan zenituzten. Nola gogoratzen duzu aurreko denboraldia?
Xabier Amiano entrenatzailea iritsi zenean Gipuzkoako Lurraldeko 2. mailan ari ginen eta hasierako helburua 1. mailara igotzea izan zen. Hori lortuta, igoera fasea jokatzen aritu ginen baina ez genuen lortu Euskal Ligara igotzea. Denbora-tarte batean Valentzia aldean ibili nintzen eta, itzulitakoan, Euskal Ligara igotzeko erronka jarri genion gure buruari. Oso talde sendoa genuen, postu guztiak ondo beteta genituen. Aspalditik ezagutzen genuen elkar eta lor genezakeela sinetsita geunden. Lan handiaren ondorioz iritsi zen igoera. Zeren eta lurralde mailako lehen taldean oso maila orekatua dago. Edozeinek irabaz zaitzake eta, horregatik, oso erregularra izan behar duzu. Oso ondo ekin genion denboraldiari, sentsazio onekin eta puntuak pilatuz. Helburua gertu ikusten genuen. Bestalde, lesiorik ia ez genuen izan eta hori oso lagungarria da helburu handiei ekiteko.
"Igoera lortu arteko azken txanpa ikaragarria izan zen. Sekulako bultzada sentitu genuen harmailatik"
Herrian ere babes zabala jaso genuen eta kanpoko partidatan ere zaletuen laguntza izan genuen. Kanpoko partida batzuetan etxean bezala sentitzen ginen.
Eta historia egin zenuten!
Bai, gizonezkoen mailan lehen aldia izan baita Euskal Ligan aritzeko aukera lortu dugula.
Denboraldia hasi zenuen, eta debuta egin ahal izan zenuen. Euskal Ligan jokatu duzula esan dezakezu. Izan ere, denboraldi honetan ez duzu jokatuko.
Ez. Niretzat aspaldi amaitu zen denboraldia. Zarautzen aurkako partida izan zen azkena. Liga kanpotik ikusi dut eta esperientzia polita izan da. Maila eta jokoa oso ezberdina da Euskal Ligan.
Jauzi handia delako diozu?
Bai, fisikoa da erabat eta aurkari gehienek partidaren egoera aztertzeko maisutasun handia erakusten dute. Urte luzez doitutako taldeak dira.
Hasteko eta behin, igotzea oso zaila da. Denboraldi perfektua egin behar duzu helburu hori lortzeko. Baina, behin igoera lortuta, mailari eustea ere oso zaila da. Talde gehienetan esperientzia handiko jokalariak dituzte eta harrobi lan bikaina egiten ari dira.
"Urte bikaina izan genuen eta, aurten, bajak direla, lesioak direla, mailari eustea oso zaila da"
Zer da zuretzat Leizaran eskubaloia?
Oxigenoaren parekoa da niretzat. Entrenatzaileak eta jokalariak txikitatik ari gara honetan eta niretzat kirol jarduera bat baino askoz gehiago da.
Zuen arteko giroa oso ona dela antzematen da.
Familiaren pareko ditut nire taldekideak. Bizitzako une asko partekatu ditut jokalariekin eta hori kantxan eta kantxatik kanpo antzematen da.
Kanpotik ari zara taldearen martxa ikusten. Prestaketa saioetan eta partidatan. Nola baloratuko zenuke taldea egiten ari dena?
Erresilientzia. Hitz horrekin definituko nuke taldea. Egoera zailetara egokitzeko gaitasuna erakusten ari direlako. Borrokan ari gara, baina emaitzak ez dira iristen. Eta, halere, taldea lanean ari da, Olatz Olmedo entrenatzailea buru dela. Bajak, entrenatzaile aldaketa, lesioak… Aldaketa asko egon dira eta, gainera, zorte txarra izaten ari gara. Denboraldi honetan lehian ari dena ez da Euskal Ligara igotzea lortu zuena.
"Aurreko denboraldia eta aurtengoa txanponaren bi aldeekin parekatuko nituzke"
Aurtengo esperientzia baliagarria izango da geroan ere.
Hori litzateke helburua: berriro ere Lurralde mailako lehen mailan lehiakorrak izatea.
Itzulera noizko duzu aurreikusita?
Kasu bakoitza ezberdina da, baina nire lesioarekin urtebete eman beharko nuke jokatu gabe. Berriro lehiara itzuli ahal izateko hilabete gehiago behar ditut. Beraz, espero dut azarorako itzultzea. Aurredenboraldiari ekingo diot, baina nire kontura.