Andoain-Bakio, Euskal Herriko Erremintako Herriarteko finala, Gasteizen gaur

aiurri 2025ko uzt. 26a, 09:01

Bost pilotariak Maider Poncerekin Altza auzoko pilotalekuan, maiatzaren 23an, Gipuzkoako txapelketaren baitan Donostiaren aurka jokatu zuten finalerdian (Argazkia: Mateo Ponce)

Andoaingo eta Bakioko (Bizkaia) pala pilotariek Euskal Herriko Erremintako Herriarteko finala jokatuko dute Gasteizen, gaur goizeko 11:30ean. Gazteleku Pilota Eskolako Ibai Iradi, Iñaki Lopez de Munain, Koldo Ponce, Ibon Altuna eta Aritz Rekalde ari dira ordezkatzen Andoaingo taldea aurtengo denboraldiko herriarteko txapelketetan, paleta larruz eta pala motzean.

Finala zuzenean ikusteko aukera izango da, Euskadiko Euskal Pilota Federakuntzaren facebook kontutik.

Andoaingo ordezkariek denboraldi bikaina egin dute Herriarteko txapelketan, eta kanporaketa guztietan erakutsi duten sasoi bikain horri eusteko itxaropenarekin doaz Gasteizeko finalera. Jarraitzaile ugari izango dute harmailetan, animoak emateko.

2016ko finala

Orain arte, Andoainek behin jokatu izan du Euskal Herriko finala, 2016an Gasteizen aurka, hain zuzen. Galdu egin zuen txanda hartan. Ea oraingoan txapelarekin itzultzen diren herrira.

Ibai Iradi, Koldo Zabala, Ibon Altuna eta Aritz Rekalde, 2016ko finalean

Gasteizko finala iragartzen duen kartela:

Kirola Andoain

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!