Hernaniko Papelera Zikuñaga Txapelketako jubenilen mailan, Aimar Berozek urrea lortu zuen, Leitzako Sagastibeltza bikote izanda; finalean, 22-6 menderatu zuten Izagirre-Azpeitia bikotea.
Biharamunean, Txapelketa berean, Nora Mendizabalek ere txapela burura eraman zuen emakume nagusien elite mailan. Goiuri Zabaleta eta biak 22-8 nagusitu ziren Ibarrola-Bertiz bikotearen aurka, finalean.
Azkenik, Jon Eskudero andoaindarrak eta Julen Urruzola asteasuarrak Zarautzeko Frontoi-Txikin jokatzen den Zaporra Memorialeko txapela jantzi zuten, abuztuaren 7an jokatu zen finalean Urbieta-Bereau bikotea 22-20 mendean hartu eta gero.
(Argazki sorta, Gaztelekuko Pilota Eskolak sare sozialetan daukan x kontutik lortu da).
Lopez de Munain, euskal selekzioarekin
Bestalde, nabarmentzekoa ere bada, Gaztelekuko Iñaki Lopez de Munain pala pilotaria Argentinan jokatuko den FIPVren Trinketeko 23 urtez azpiko Munduko Txapelketan jokatzeko hautatu dutela; gomazko paletan ariko da Lopez de Munain. Irailaren 14tik 20ra ospatuko da mundu mailako txapelketa, eta Euskal Pilota Selekzioak lehen aldiz hartuko du parte bertan.
Lopez de Munainek euskal selekzioarekin jokatuko du berriro, bi hilabete beranduago. Hain zuzen, azaroaren 23tik 30era, Bilbon jokatzekoa den Nazioen Ligan, larruzko paletako eta pala motzeko modalitateetan ordezkatuko du selekzioa.
