Xabier Alkortak eta Iraitz Zabaletak Elizondo etxeko terrazatik egin zuten pregoiak eta itxarefoak eman zien hasiera jaiei, ofizialki. Hartaz gero, arratsaldean, Gora Kaletxiki txarangak emanaldi dotorea eman zuen eta Iturzaeta memorialeko pala txapelketako finalen errebantxak jokatu zituzten (argazki-sorta eta sari-emate ekitaldia, ikusgai web orrian).
Elizaren arkupetan egin zuten auzo-afariarekin eta Itzal taldeak girotu zuen erromeriarekin (argazki-sortako irudiak, taldeak utzitakoak dira) eman zioten amaiera atzoko lehen jai egunari.
Gaurko, honako egitaraua prestatu dute:
11:00. Artisauen azoka eta haur jolasak.
17:00. Desafioa, herri kiroletan: Goiburu-Sorabilla.
18:00. Bertso-saioa. Aitor Mendiluze, Amets Arzallus, Nerea Elustondo eta Ane Labaka Mayoz. Gai-jartzailea: Amaia Agirre.
21:00. Zikiro jatea. Urdaiazpikoa, txorizoa, saltxitxoia, entsalada mistoa, zikiroa eta gazta-tarta. Txartelak salgai Elizondo eta Txuri Beltz tabernetan. 34 euro (abuztuaren 28a, ostegunearekin, azken eguna).
11:30. Kontzertua Herenegun taldearekin.
Ondoren, musika Stri Nain eta Drims DJekin.
“Sorabilla” eta “Joxe Mari Iturzaeta” abestiak
Gora Kaletxiki txarangako musikariek, emanaldiari ekiteko, Sorabillari estuki lotuak dauden bi abesti interpretatu zituzten, Joxe Mari Oiartzabal zuzendari zutela: “Sorabilla” eta “Joxe Mari Iturzaeta”.
Doinu eta hitz dotoreen jabe dira biak ere, Joxe Mari Oiartzabal musikariak konposatuak, eta Aitor Mendiluze bertsolariak hitzak jarrita.
“Sorabilla”
Belkoainen magala,
altzo goxoena,
Oria ibaiak urez
osatzen duena.
Bertan auzo bat dago
herri izan zena,
sortzetik Sorabilla
du bere izena
datorkionarentzat
irekitzen dena.
Oria zeharkatzeko
zituen zubiak.
Azelain printzipala
eta beste biak.
Errotak, tolarea
eta karobiak.
Leizarandik zetozen
mehatze gurdiak,
denak gordetzen ditu
bere memoriak.
Guzti honen testigu,
begirale isil,
Belkoain makurtzen da
beregana umil.
Iragana urrun du,
izan zena hurbil,
eta izango dena
eraikitzen dabil,
herri sentimentua
inoiz ez baita hil.
Beste edozein herri
baino herriago,
nortasun bizia du,
berea zeharo.
Eta nortasun hori
hitzetik harago,
sorabillatarrengan
zegoen lehenago,
gaur "Sorabillatarren
Bihotzean" dago.
“Joxe Mari Iturzaeta”
Pagoak erantzuten
dio harriari
eta kolpeen hotsa
entzuten da argi.
Ia pentsa daiteke
ez ote den ari
pilota ere zuri
deika Joxe Mari.
Hiru hormen munduan
agintari goren,
bat gehiago bertatik
atera ondoren.
Horrek erakusten du,
denetan ondoen,
oroimenean zenbat
gordeta dagoen.
Ezker eskua beti
pilotaren bila,
eskuinak agur goxo.
Etxeko, hurbila,
izan zarena gugan
geratu dadila.
Beti zordun izango
zaizu Sorabilla.
