Badira arrasto sakona uzten duten pertsonak eta horietakoa da Joxe Manuel Erkizia. Aski maitea zen Andoainen eta, bereziki, Kaletxiki auzoan eta Ontza elkartean. Azken hilabeteak eman ditu pattal antzera, baina gainerakoan, egunero ikus genezakeen auzoan eta plaza inguruan.
Lehendakari guztiak ezagutu zituela zioen maiz, esan nahi baita, Jose Antonio Agirre lehendakaria ere gertutik ezagutu baitzuen. 102 urtetan abertzaletasunari eutsi zion tinko eta EAJ-PNVko afiliatu modura protagonismo handia lortu zuen. Bereziki, iaz, Alderdi Egunean oholtza gainera igo baitzen Pradales lehendakariarekin batera. Gaur ospatzekoa da Alderdi Egunaren edizio berria eta, ziur, jeltzaleek gogoan izango dutela.
Dagoeneko, Andoaingo EAJ-PNVk eman du heriotzaren berri:
Egun berezia da #AlderdiEguna EAJ-PNVko familiarentzat. Gaur, are bereziagoa #Andoain-darrontzat.
— EAJ-PNV Andoain (@eajpnvandoain) September 28, 2025
Goizaldera Joxe Manuel Erkiziak utzi egin gaitu.
102 urterekin alderdiko afiliatu zaharrena zen. Euskalzalea, pelotazalea... baina batez ere abertzalea.
🟥⬜🟩 Goian bego! pic.twitter.com/rcuu42S5BT
Iazko Alderdi Eguneko protagonista izan zen
Kaletxiki, Ontza elkartea
2023an ehun urte bete ziruen eta Ontza elkarteak merezitako omenaldia egin zion. Hauexek, omenaldia egiteko arrazoiak, orduko zuzendaritzaren hitzetan: “Andoaindar eta kaletxikitar petoa, ehiztari amorratu eta muslari sutsua, kirolaria eta lagun handia izateaz gain, hurbileko eta lagun giroko pertsona da Joxe Manuel Erkizia eta horregatik, egin nahi diogu eskertza ekitalditxo hau”.
Afariaren ostean, elkartean bilduak ziren kide guztiek, zutik jarri, Aitor Mendiluze bertsolariak osatu dituen bi bertso abestu zizkioten. Hona zer dioten bi bertsoek:
Joxe Manuel, ehun urte
ez da bide motza.
Kaletxikiko pieza
ehiztari zorrotza.
Euskal Herriak bete
dizula bihotza,
Eskertzeko egin nahi
dizugu aitortza.
Zu bertan izateaz
harro dago Ontza
Bizitzari enbido,
ezinari paso,
pare ederrak eta
jokoan eraso.
Dena ez zen gozoa
izango akaso,
baina zure elkarte
eta zure auzo,
bihotzez gu guztion
zorionak jaso.
Pilotazale amorratua, Barrenetxea IVren jarraitzaile sutsua
Opari gehiago jaso zituen Erkiziak, Ontza elkarteko omenaldian. Jakinda Erkizia esku pilotari trebea izan zela gaztetan, pilotazale amorratua betidanik, aspaldiko urtetan ez zuen hutsik egiten Galarretako erremonteko pilota partidetan eta bertan aritzen den Barrenetxea IV pilotaria zuen kuttunena. Bi opari berezi-bereziak jaso zituen orduko hartan: Barrenetxea IVren elastikoa eta erabilitako saskia.
Euskal Pilotako Nazioen Liga jokatu zen, ekainean, Gernikan, Euskal Selekzioaren partaidetzarekin. Bertan izan zen, ikusleen artean, gonbidatu berezia: Jose Manuel Erkizia 102 urteko andoaindarra.
Soldadutzan ere pilotan aritu zela gogoan hartu zuen Ahotsak egitasmoan. Garai hartan 28 hilabetekoa zen soldaduta eta pilotan aritzea izan zen bere zeregina. Halaxe azaldu zuen 2010eko bideoan:
Kontsejupeko txapelketaren jarraitzaile fidela
San Juan jaien bueltan jokatzen den Kontsejupekoaz gozatzeko ohitura zuen Jose Manuelek.
2019ko edizioa.
2022ko edizioa.
Atzoko Andoain eta Andoaindarrak
Iragan kontuak bildu zituen "Atzoko Andoain eta andoaindarrak" argitalpeneko protagonistatakoa izan zen. XX. mendearen lekukotza aparta da Larramendi Bazkunak argitara eman eta Jone Larrañaga kazetariak zuzendu zuena.
Honatx, iraganeko Andoain biziberritzen lagundu zuen herritar taldea:
- Jose Manuel Erkizia Urla
- Miren Zarraga Pagola
- Joxe Eizmendi Jauregi
- Bixente Olano Otegi
- Loren Navarro Hombrados
- Josepa Ormaetxea Mujika
- Mikela Ansa Goenaga
- M.Esther Arrieta Lizarribar
- Iñakí Arregi Moraza
- Jose Mari Olazabal Iñurrita
- Imanol Egibar Juanena
- Jose Mari Amutxastegi Aranzabal
- Roke Ansa Goenaga
- Migel Amas Egibar
- Bixente Huizi Zuñiga
- Patxi Irizar Zarautz
Mus jokalari bikaina, zaletu peto-petoa
Ekainean, Ontza elkartean, XLIX. Mus Txapelketa-Joxe Mari Erkizia memoriala jokatu zen. Rafak eta Jose Luisek jantzi dute txapela, finalean Berrobi II eta Mujika garaituta. Bertan izan zen, nola ez, Erkizia.
