Elkarteko kideek gogorarazi dutenez, “Txelis” zaragozarra zen jaiotzez, eta familiarekin Andoainera heldu zen gaztetan. Encarna Iñurritarekin ezkondu, eta biak Villabonara joan ziren bizitzera.
Adierazi dutenez, "Txelis"ek Burdinaren sorreran parte hartu zuen orain kasik 25 urte direla, eta geroztik, beti erakutsi izan du erabateko prestutasuna ondare historiako berreskuratze eta plazaratze aldera elkarteak burutu izan dituen egitasmoetan. “Ez zuen hutsik egiten lanerako deialdia egiten zenetan”.
Alde horretatik, taldekide “leiala eta konprometituta” izan zela beti nabarmendu dute.
Lanerako ez ezik, talde giroa alaitzeko abiltasuna ere bazeukala gaineratu dute, “solasaldi ederrak eskaintzen zizkigun, umoretsu beti”.
Azkenik, jakinarazi dute "Txelis" bereziki hartuko dutela gogoan datorren hilean, azaroan, Ortzaikako karobiaren pizte-ekitaldian, “omenaldi xume bat egingo zaio taldekideen partetik guri eta herriari eskainitakoa eskertuz”.
