Pello Oriarekin ezkonduta, Aizpea eta Asierren ama zen. Familiak zabaldu duen heriotz-oharrean esaldi ederra ipini dute: "Hemendik aurrera bere irriak gidatzen jarrai gaitzala".
Andoainen erabat inplikatuta zegoen Arantxa Irigoras.
Aita Larramendi ikastola
Aita Larramendi ikastolako lehendakaria izan zen aurreko hamarkadan, eta bete-betean harrapatu zuen Kilometroak jaiaren antolaketak.
2011ko urriko bideoan, Kilometroak-en aurkezpen-jaiaz hizketan ageri zen:
Udal Musika Eskolako Banda
Klarinetea jo zuen Udal Musika Eskolako Bandan eta dozenaka emanaldi egin zituen taldeko partaide izan zen epealdian.
Mikel Emezabal Udal Musika Eskolako Bandako zuzendariaren aitortza:
"Arantxak utzi gaitu. Musika Banda bihotzean zeraman eta gure artean betiko geratuko da. 15 urte baino gehiago egin zituen, alai eta ilusioz beterik. Bere asmoetako bat zen berriro bandan jo ahal izatea, klarinetea alboan zuela. Musika izan zuen bidelagun, bere parterik garrantzitsuenetakoa bihurtu zelarik. Urte horietan guztietan harreman estua izan zuen bandakide guztiekin eta gaur goxo-goxo agurtzen dugu, abesti xuabe eta maitekorra belarrira xuxurlatuz. Agur Arantxa, betiko gurekin!".
Gora Kaletxiki Banda
Joxe Mari Oiartzabalek zuzentzen duen Gora Kaletxiki Bandako kidea izan zen.
Joxerramon Berrondo, Gora Kaletxiki Bandako kidea:
"Hainbat urtetan taldeko kide izan zen, osasunak eragotzi ez zion bitartean. Batez ere gugana hurbildu zen kalean musika jotzea gogoko zuelako. Dultzaina jotzen ibili zen hainbat urtez eta urte haietan klarinetearekin hasi zen. Ahal zuen bitartean aritu zen gurekin oso gogoko zuelako txarangak zuen izaera herrikoia. Gogoan ditugu saioen osteko solasaldiak, izugarri gozatzen baitzituen une haiek. Eredugarria izan zen guretzat, zituen zailtasunak izanda ere, gogotsu, trebe eta prestutasun osoz aritu zelako jendaurrean".
Herri-ekimenak
Hainbat ekimenetan parte hartu zuen aktiboki. Irunberri elkartearen itxiera arriskuan izan zenean, adibidez.
