Hona Euskalduna MTko zuzendaritzako kideek prestatu duten egitaraua:
- Azaroaren 17a (astelehena). “Alpeak alderik alde oinez eta hegan”. Mattin Iñiguezen eskutik. Euskaldunaren egoitzan, 19:00etatik aurrera.
- Azaroaren 18a (asteartea). “Palmirreko mendigunea-Lenin Gailurra”. Santi Sierra eta Oskar Ruiz de Luzuriaga mendizaleen eskutik. Euskaldunaren egoitzan, 19:00etatik aurrera.
- Azaroaren 19a. Euskalduna MTko bazkideen urteko batzarra. Euskalduna MTren egoitzan, 19:00etan.
- Azaroaren 23a (igandea). Mendi irteera eta urteko bazkaria. Andoain-Izaskun (Ibarra) irteera, eta ondoren, bazkaria Oianumen.
Alpeetan, baldintza gogorreko lehiaketan
Mattin Iñiguezek irekiko du 60. Mendi Astea. Zegamako kirolaria aurtengo Red Bull X-Alps lehiaketan izan diren 35 parte-hartzaileetako bat izan da, ekainean. Munduan jokatzen den lehiaketarik gogorrena dela diote kirola eta abentura batzen dituen Red Bull X-Apls lehiaketa. Alpeetako goi mendietan barrena (Frantzia, Italia, Suitza, Austria eta Alemania) jokatzen da, eta parte-hartzaileek parapentean eta lasterka edo oinez jardun behar dute; 1.283 km egin behar dituzte guztira, egunean 150 km. gutxi gorabehera.
