Aita Larramendi Ikastola, La Salle Berrozpe ikastetxea eta Ondarreta Herri Eskola "ANDOAINGO ESKOLA KIROLA EREDU BATERATUAREN ALDEKO HERRI ITUNA" izeneko ituna sinatu zuten. Haiei atxikimendua adierazi zieten alderdi politikoetako eta herriko kirol elkarteetako ordezkariek.
Herri itunaren muina
Udalak muina zein den azaldu du, ohar bidez: "Andoaingo Udala eta herriko hiru hezkuntza zentroak elkarlanean ari dira Eskola Kirolaren eredu bateratu, hezitzaile, inklusibo eta komunitarioa eraikitzen. Eredu berri honek Eskola Kirola hezkuntza-prozesuaren parte integrala dela aitortzen du, eta haur eta gazteen garapen pertsonala, soziala eta emozionala jarduera fisikoaren eta kirolaren bidez sustatzea du helburu. Proiektu hau Eusko Jaurlaritza-ren 8/2022 eta 2/2023 Legeetan oinarritzen da, eta marko juridiko eta pedagogiko sendo baten bitartez gauzatzen da".