Ezbeharra Arrasaten izan zen, 14:30ak aldera, GI-627 errepidean, bi autok talka egin ostean. Autoetako bat Ixak gidatzen ari zen eta istripuan bertan zendu zen. Bestearen gidaria zauritu eta Arrasateko ospitalera eraman behar izan zuten. Albistea irakurgai dago Goiena tokiko hedabidean.
Ekintzailea
Palestinako askatasunaren, justiziaren eta berdintasunaren aldeko mugimendua da BDZ (Boikota, Desinbertsioa eta Zigorrak) eta Ixak bertako kidea zen. Iazko Irailean, esaterako, Global Sumud Flotillaren aldeko elkarretaratzea eta manifestazioa egin ziren Andoainen. Amaierako adierazpena irakurri zuen bozeramaileetakoa izan zen Ixak.
Korrikaren lekuko-eramailea
Aste honetan bertan, Andoain-Urnieta arteko tartean Andoaingo BDZ taldeak Korrikaren lekukoa eraman zuen. Bada, argazkian lekukoa eramaten ageri dena Ixak da.
Kolpe handia taldekideentzat eta lagunentzat
Gazte hil da eta hori beti da kolpe handia ingurukoentzat. Andoainen ez ezik, beste hainbat kolektibotan kolpe handia izan da Ixaken heriotzaren albistea. Lagunartean, sentipen eta adiera goxo asko etorri zaizkie burura. Aiurrik jaso ditu haietako batzuk. Goxoa, alaia, leiala, borrokalaria... gure laguna, halaxe definitu dute ingurukoek. Bizipozez betea eta lagunkoia, halaxe gogoratuko dute Ixak. Maitez eta minez, umorea galdu gabe, izenondo gehiago aintzat hartu dituzte heriotzaren albistea jaso berritan: expañol, euskal mañoa, patateroa... Pertsona maitagarria izan zen gertutik ezagutu zutenentzat.