Taldeko kideek Antsoaingo Udalaren gonbidapena jasoa zuten, hango Oroimenaren Astean parte har zezaten, esanez polita izan zitekeela 1936ko errepresio frankistak biktimak oroitzeko taldeak sortu zuen “Non dira” disko ospetsuaren 20. urteurrena ospatzea han. Baiezkoa eman zion taldeak gonbidapenari, eta era horretan, kontzertua prestatzeko bildu dira entseguetan azken asteetan, Imanol Ubeda gitarra-jole eta abeslariak atzo kontzertuan aitortu zuen moduan.
Ubedak, Joni Ubeda (baxua), Joxerra Senperena (pianoa eta akordeoia) eta Karlos Arancegui (bateria) izan zituen bidelagun atzo. Dena esatera, lauetatik soilik Joni Ubeda igo zen oholtzara berriro hamar urteren ostean. Beste hiruek musikaren munduan segitzen dute hainbat proiektutan murgilduta.
Laukoteak “Non dira” diskoa osatzen duten abestiak jo zituen batik bat atzo, baina bere ibilbide luzean sortutako beste hainbat ere biziberritu zituen, Antsoaingo antzokian izan ziren musika zaleen gozamenerako.
Oroimenaren Astea Antsoainen
Egunotan ari dira ospatzen Oroimenaren Astea Antsoainen, Udalak eta herriko memoria elkarteek antolatuta. Ekimenak, kirola, kultura eta memoria demokratikoa uztartzen ditu, 1938an San Kristobal gotorlekutik ihes egin zuten 795 presoek askatasuna lortzeko egin zuten saiakeraren oroimena ipar izanik batik bat.
Beste zenbait ekitaldiren artean, nabarmentzekoa da bihar ospatuko duten La Fuga mendi lasterketaren bigarren edizioa. Ezkaba menditik abiatu eta Urepel herrian amaitzen da 52 kilometroko lasterketa. GR 225 “1938-Ezkabatik Ihesa” ibilbide homologatua jarraitzen du, 1938 maiatzaren 22an 795 preso errepublikanoen ihes hartzen du gogoan, eta hain zuzen, askatasuna lortu zuten hiru presoek egin zuten ihes-bidea.
