Palestinan sustraitutako doinuen eta musika modernoen arteko fusioa egiten du Sol Band Gaza taldeak. Bizitzari eta itxaropenari eusten dioten melodia biziekin osatzen ditu zuzeneko kontzertuak. Taldeko kideak Israelen genozidiopean zortzi hilabetez egon ziren, eta 2024ean Gazatik ateratzea lortu zuten. Beren herriaren ahots bilakatu dira geroztik. “Musikaren bitartez munduari palestinarrak bizitzen ari diren sarraskia eta haien sufrimenduaren berri emateko helburua” dutela adierazi dute.
Ekimen solidarioa Plaza Morean
Kontzertua hasi aurretik, Plaza Morean, 17:00etan, ekimen solidarioa egingo dute, AMMA (Andoaingo Emakume Musulmanen Kultur Elkartea) eta Ongi Etorri Eskolara taldeek elkarlanean.
“Batzen gaituzten zaporeak eta artea: pintxoak, henna postua eta artikulu solidarioen salmenta” izango dela adierazi dute antolatzaileek.
Sol Band Gaza Euskal Selekzioa-Palestina partiduan
Iazko azaroaren 13an, Euskal Selekzioa eta Palestinako selekzioko futbol partidaren harira Gernika-Palestina ekimenak antolatuta EHUn egin zuten ekitaldian parte hartu zuten Sol Band Gaza taldeko kideek. Ekitaldi hura, ikusgai: