Bi partidutan lortutako tantoei esker eskuratu zuten txapela. Izan ere, paletan, Aritz Rekalde-Ibai Iradi bikoteak 35-33 galdu egin zuen; pala motzean, berriz, Ibon Altuna-Koldo Poncek 40-25 garaitu zituzten Errenteriako aurkariak.
Gipuzkoako txapelaren lorpena ospatzeko, Gaztañaga sagardotegian bildu ziren, afaritan, pilotariak eta Gazteleku Pilota Eskolako gainerako kideak.
Dagoeneko Gipuzkoako bederatzi txapela irabazi dituzte Andoaingo pilotariek; herrialdean txapelketa gehien eskuratu duen herria da Andoain.
Gomazko paletan, finalerditaraino
Bestalde, Andoaingo gomazko paletako pilotariek Gipuzkoako Herriartekoaren finalerdietara iritsi diren arren, ezin izan dute finalerako txartela lortu, Tolosaren aurka galdu baitzuten.
Hiru modalitateetan jokatu ohi da Gipuzkoako gomazko paleta txapelketa: banaka frontoi osoan, banaka zazpi barruan, eta, binaka. Honako pilotariek ordezkatu zuten Andoain: Oier Belauntzaran, Jon Jauregi, Mikel Arberas eta Mikel Agirre.
