Sorabilla auzoko N-I eta A-15 errepideen bide-txirikordatzea aldatu eta trafikoa berrantolatzeko proiektuaren idazketa lizitatu da berriki, Aldundiak jakinarazi duenez.
Aldundiak gehitu du proiektuak N-I eta A-15 errepideen arteko txirikordatzea berrantolatzea planteatzen duela Sorabilla parean, “maniobra konplexuak saihesteko eta trafikoa modu ordenatuagoan bideratzeko, zirkulazioaren segurtasuna eta arintasuna hobetuz zirkulazio-intentsitate handia duen tarte horretan (23.511 ibilgailu egunero N-I errepidean eta 6.747 A-15 errepidean)”.
139.213,92 eurokoa da proiektua idazteko aurrekontua, eta zazpi hilabetekoa da gauzatzeko epea.
N-1 eta A-15eko konexioa, arrisku-gune
Aldundiak aitortu arrisku-egoerak eragiten dituela N-I eta A-15 errepideen arteko konexioak, gaur egun. “N-I eta A-15 errepideen arteko konexioa Iruñerako norabidean 194 metro eskaseko elkartze-tarte baten bidez egiten da. Tarte horretan bat egiten dute N-I errepidetik zirkulatzen duten eta A-15 errepidera sartu nahi duten ibilgailuek, hala nola, Sorabillatik irten eta N-I errepidera Gasteizerako noranzkoan doazenek. Errei-aldaketak egiteko erabilgarri dagoen tarte txikiak eta trafiko-intentsitate handiak arrisku-egoerak sortzen dituzte eta zirkulazioa zailtzen dute”.
Horrenbestez, proiektuaren helburua egungo txirikordatzea kentzea dela gogorazi du Aldundiko Bide Azpiegituretako eta Lurralde Estrategiako departamentuak. Hori dela eta, “N-I errepidetik Tolosarako noranzkoan jarraitu nahi duten trafikoak eta A-15 errepidetik Iruñerako norabidean jarraitzen dutenak egungo puntua baino lehen bereiztea aurreikusten da. Horrela, A-15 errepidetik jarraitzen duten ibilbideak eta Sorabillatik N-I errepidera sartzen direnak elkartzea saihesten da”.
Azkenik, Aldundiak adierazi du lizitaziora atera duen proiektuak berri hori Andoaingo Hobekuntza Plan Integralaren baitan kokatzen dela. “Sorabillako proiektua idazteko lizitazioarekin, Aldundiak Andoaingo Hobekuntza Plan Integralaren garapena osatzen duten jarduketa guztiak jarri ditu abian, garapen teknikoaren eta izapidetzearen fasean jada, obren lizitaziorako eta ondorengo exekuziorako hurrengo urratsak planifikatzeko”.
Aldundiak bi foto-muntai zabaldu ditu, Sorabilla auzoko N-I eta A-15 errepideen bide-txirikordatzea aldatzeko eta trafikoa berrantolatzeko proiektuaren gainean:
