Elkarte berezia da Bizipoza elkartea. Haur eta familien ongizatea helburu duten elkarte ezberdinei laguntza afektiboa eta materiala eskaintzea du helburu. Eta aldi berean, elkarte hauek transmititzen dituzten baloreak jaso, hauekin aberastu eta hezi, eta hauek gizarteratuz herri inklusiboago bat eraikitzeko saiakera egiten du elkarteak.
Momentu honetan Euskal Herrian aritzen diren 35 elkartek osatzen dute Bizipoza. bizipoza.eus webgunean ikus daitezke guztiak. Urtarrilaren 31n Asteasun egingo duten aurkezpen ekitaldian, hiru elkarteren inguruko dokumentalak eta Bizipozarena berarena izango dira ikusgai eta horrekin batera, baita Asteasuko dantzarien, Amaia Agirre bertsolariaren eta Aitor Atxega musikariaren emanaldiak ere. 19:00etan hasiko da aurkezpen ekitaldia, udaletxeko aretoan.