Asteasuarrei zabaldu zitzaien, lehendabizi, bazkidetza egiteko aukera. Toki libreak geratu zirenez, eta inguruko herrietako jendeak ere interesa azaldu zuenez, haiei ere eskaini zitzaien bazkide egiteko aukera. Aurten igerilekura sartu ahal izateko, behar-beharrezkoa izango da bazkide izatea, beraz, ez da eguneko sarrerarik egongo. Gehienezko jende kopurua errespetatzeko beharrari erantzunez, igerilekua erabili ahal izateko ordutegi ezberdinak finkatu dituzte. “Bazkide bakoitzak gehien komeni zaion ordutegia aukeratu ahal izan du. Arratsaldez bi ordutegi egongo dira: 14:00-16:45 eta 17:15-20:00, goizez, guztientzat zabalik egongo da, gehienezko jende kopurura iritsi arte. Arratsaldeko ordutegiak, txandatuz joango dira hamabostero”. Igerilekura sartzeko txartelean bertan ageri da zein ordutegitan izango den erabilgarri.
Ekaina erdialdetik iraila erdialdera martxan izan ohi da igerilekua baina, laburragoa izango da aurtengo denboraldia. “Uztailaren 1ean zabaldu dugu igerilekua, eta abuztu amaieran ixtea aurreikusten dugu. Igerilekuak urtero zulo ekonomikoa sortzen dio Udalari eta aurtengo baldintzekin, are gastu handiagoa eragingo du. Horregatik, denboraldi laburragoa egitea erabaki dugu”, azaldu du Pili Legarrak.
Taberna zerbitzurik ez da egongo aurten. “Mahaien arteko gutxieneko segurtasun tartea errespetatuz gero, tabernako terrazan oso jende gutxi sartzeko aukera izango genuke, eta ez litzateke inola ere errentagarria izango. Horregatik, aurten ez da tabernarik martxan jarriko. Jendeari gutxieneko zerbitzua eskaintzeko, jateko ezberdinak eta edari hotz zein beroak erosi ahal izateko makinak jarriko dira”.
Segurtasun arauak zaindu eta errespetatzeko deia zabaldu die Pili Legarrak herritarrei: “Elkarrekin bizi diren pertsonek elkarrekin egoteko aukera izango dute, belazean prestatuko ditugun gune edo partzelatan. Gainerakoek, distantzia mantendu beharko dute, eta ezingo da gune edo lursail batetik bestera ibili. Igerilekutik sartu eta ateratzeko garaian, ondo markatuta egongo diren pasabide edo pasilloak erabili beharko dira”. Uretan ere, gehienezko aforoa egongo da, eta bainuak hogei minutu ingurukoak izan daitezela gomendatzen dute Udaletik, errotazioa egon dadin. Sorosleak arduratuko dira segurtasun neurri horiek guztiak betetzen direla ziurtatzeaz.