Azken egunetan sei koronabirus kasu antzeman dituzte Asteasun. Pili Legarra alkateak lasaitasunerako deia egin du. "Etxe bereko kideak dira guztiak. Osakidetzarekin harremanetan gaude eta erabat kontrolpean dago egoera. Positibo eman duten pertsona guztiak itxialdia ondo errespetatzen ari dira, eta oso sintoma arinak dituzte gainera. Lasaitasunerako deia luzatu nahi dut".
Lasaitasunerako deia egiteaz gain, positibo eman duten pertsonen intimitatea eta pribatitatea zaintzeko deia ere egin du Pili Legarrak. "Koronabirusa gaixotasun bat da, eta edonorri gerta dakioke. Ez da egokia inor seinalatzea, eta familiak ere hala eskatu du. Diskrezioz jokatu behar dugu, eta probatan positiboa eman dute pertsona horien intimitatea zaindu".