Ez da lehenbiziko aldia Andoaingo Bandak Asteasun jotzen duela; kantutegi erakargarria eraman izan du hara beti, eta harrera beroa egin izan diote Asteasuko musika zaleek. Oraingoan, nabarmentzekoa da Mirari Irurtzunek konfinamendu garaian sortu zuen “Asteasu” abestia interpretatuko duela.
“Asteasu” abestia sortu eta handik gutxira, bideo ikusgarria egin zuten. Bertan, herriko hainbat kulturgilek hartu zuen parte, eta 2021eko ekainaren 28an, herriko plazan bertan estreinatu zuten. Hona bideoa:
Ekimen kolektiboa
Irurtzunen asmoa izan zen hasieratik abestia ekimen kolektiboa eta parte-hartzailea izatea, eta horrela, herriko hainbat kulturgile agertzen dira bertan.
Mirari Irurtzun berak, Haritz Mujika hitzen sortzaileak Andoni Ezkerra abeslariak azaldu zituzten kantuaren eta bideoaren nondik norakoak, estreinaldiaren atarian Aiurrirekin egin zuten solasaldian.
Irurtzunek egunotan adierazi duenez, “bideoa estreinatu zenez geroztik, beti egon da piztuta ilusioa, noizbait, hainbat musikarik zuzenean jo zezaten”.
Bizirik mantendu da azken bi urtetan Ilusio hori, eta igandean gauzatuko da, horrenbestez. Izan ere, egitasmo horri gogotsu heldu baitiote, elkarlanean, azken aldiko entseguetan, Andoaingo Udal Eskolako musikariek eta Asteasuko hainbat abeslari, musikari eta dantzarik.
Mirari Irurtzun biolin jolea da, eta Andoaingo Udal Musika Eskolako irakaslea. Andoaingo Bandak Asteasun 2021eko azaroan eman zuen kontzertuan, bera gonbidatu berezia izan zen, eta Czardas (Vittori Monti) abestian interpretatzaile nagusi gisa jardun zuen.