Eguraldi eguzkitsuarekin abiatu dira aurtengo Sanpedroak. Jaietako lehen egunera ekarri dute aurten herritarren arteko herri kirol lehia, eta ederra joan da. Bost taldetan banatuta aritu dira eta erronda bakarrean, talde guztien arteko lehia zuzena izan da ikusgai.
Bi zati izan ditu lehiak. Bikoteka, harrijasotzen eta arrautza goilaran jarrita ibilalditxoa egiten eman diote hasiera. Talde gorriko bikotea izan da azkarrena lanak bukatzen eta saria jaso dute amaieran.
Hainbat kiroletan lehiatu dira ondoren. Karretila, txingak, lokotx biltzea, zaku lasterketa, kontrabandoa eta korrika egin ondoren, talde bakoitzeko segalariek hartu dute lekukoa. Haien lana amaituta, berriz ere ekin diete aurreko lanei. Talde txuria izan da azkarrena eta haiek ere saria jaso dute amaieran.
Giro eta umore ederrean joan da herri-kirol saioa. Jende asko gerturatu da ikustera eta, txupinazoaren aurreko orduetan motorrak berotzeko modu paregabea izan da.