10:30etan eman zaie hasiera haurren kirolei. Beñat Garcia eta Aritz Segurola herritarrek gidatuta, kirol ezberdinetan aritzeko aukera izan dute haur eta gaztetxoek.
11:00etan meza ospatu dute Santa Krutz ermitan. Lehen Jaunartzea ere egin dute gaurkoan zenbait gaztetxok eta ermita bete egin da.
Haurrek kirolak eta meza amaituta, Elizmendiko plazan elkartu dira guztiak, hamaiketakoa jateko. Salda, haragi egosia eta txorixo egosia gustora hartu dituzte bertan bildu direnek. Barraren bestaldean, lan eta lan aritu da herritar talde bat, hamaiketakoa prestatu eta zerbitzen.
Sabelak beteta, toka txapelketari ekin diote. Adinaren araberako hiru mailatan banatuta, hamarnaka herritarrek hartu du parte.
Ederra joan da goiza Elizmendin eta, festak ez du etenik izango iluntzera arte.