Espainiako Kultura Ministerioak atzo jakinarazi zuen saridunaren izena. Epaimahaiaren iritziz, "euskararen eta gazteleraren modernizazioari eta nazioarteko proiekzioari ekarpen funtsezkoa" egin dio Atxagak. "Poesiaz blaitutako narratiba baten bidez" egin du hori idazleak, "zeinetan errealitatea eta fikzioa distiraz konbinatu dituen".
Asteasun 1951. urtean jaioa, Ekonomia Zientzietan lizentziatu zen Bilboko Unibertsitatean, eta, hainbat lanbidetan aritu ostean, idazle lanetan erabat hasi zen 1980ko hamarkadan. Genero ezberdinetako lanak argitaratu ditu ordutik eta bere liburuak 34 hizkuntzatara itzuli dituzte. Euskaltzain oso da 2006tik, baita Jakiundeko kidea ere, 2010etik.