Erremontea

Urrizak hirugarren garaipena eskuratuta buruz buruko finala jokatuko du

Bi pilotariek maila handia erakutsi zuten eta larunbatean jokatu zen partidan. Barrenetxeak min hartu zuen arren, buruz buruko txapela defendatzen jarraitu zuen. Urrizak, bere aldetik, finalerako txartela eskuratu zuen.

Javier Urrizak hirugarren garaipena eskuratu zuen Kutxabank Txapelketako finalerdietako ligaxkan (24-30). Partida irabazita aurrelari iruindarrak ligaxkako garaipen guztiak eskuratu ditu, eta finalera zuzenean pasa da hamabi punturekin. Finalerako txartela Juaneneak eta Endikak jokatuko dute datorren larunbatean, ligaxkan bigarren eta hirugarren sailkatuak ziurtatu ondoren. Barrenetxeak lehen puntua eskuratu du, baina txapelketatik kanpo geratu da.

Galdu arren, atzelari hernaniarrak hobeto jokatu zuen eta aurreko bi partidetan baino itxura hobea eman zuen. Partidan maila altuagoa erakutsi zuen eta partidako tanto onenak egin zituen, nahiz eta galdu. Aurreko bi partidetan bezala, sakeak huts egin zion.

Partida polita izan zen, erritmoa eta joko ona eduki zuen. Hasiera parekatuaren ondoren Urrizak bost tantoko aldea lortu zuen, 7-12koa, baina txapelaren defendatzaileak aurre egin zion eta tanto bakarrera jarri zen 18-19koan. Lehenago, pilotakada batek hanka zauritu zion eta partidaren ostean hainbat puntu jaso behar izan zituen.

Horrek ez zion dueluan jarraitzea eragotzi eta Urrizak aldea zabaldu zuen markagailuan, 20-25. Abantaila amaierara arte mantendu zuen. 24-28koaren ondoren Urrizak partidako azken bi tantoak egin zituen. Irabazleak 23 tanto egin zituen piloteoan, lau sakez, sake falta bat eta huts bat. Barrenetxeak 18 tanto egin zituen piloteoan, lau sakez eta hiru akats egin zituen.

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!