"Normaltasun cisheteropatriarkalaren aurrean kaleak hartuko ditugu. Elkar zainduz autodefentsa feminista!", zioen manifestazioko pankartak. Okendo plazan ekin zioten ibilbideari eta herriko kaleetan murgildu ziren jarraian. Bi lerrokada luzeetan antolartuta egin zuten manifestazioa, eta hasierako leku berean eman zioten amaiera mobilizazioari.
Mende luzez emakumeei ukatutako espazioak bereganatzeko borroka egingo dutela aldarrikatu zuten, baita izaten diren erasoei erantzuna ematen jarraituko dutela jakinarazi ere. Egunerokotasunean beldurrez bizi diren emakumeak izan zituzten gogoan, eta berriki saretzen hasitako Buruntzaldeako Neska* Gazteak taldeak lanean jarraituko duela gogorarazi zuten: "Gure hautuan berresten gara, elkar zainduz eta autodefentsa feministaren bitartez, hortzak erakutsiko dizkiogu ahul eta itzaletan nahi gaituen sistemari. Ez dugu inongo erasorik onartuko!".