Tokian tokiko eragileak garrantzia handikoak dira, horrelako egunetan. Ezinbestekoak, esango genuke. Barberenak eta Andoaingo Txirrindulari Eskolak eskarmentu handia du, hamarkadak eman dituztelako proba ezberdinen antolaketan. Jubenil mailakoa edota profesional mailakoa izan, txirrindularientzat arriskuak beretsuak dira. Seinaleztapen egokia, hesiak eta bidean diren laguntzaileen oharrak garrantzia handikoak dira, beraz.
Jubenil mailakoa edota profesional mailakoa izan, txirrindularientzat arriskuak beretsuak dira. Seinaleztapen egokia, hesiak eta bidean diren laguntzaileen oharrak garrantzia handikoak dira, beraz.
COVID-19 garaian, ikuslegoaren presentzia txikiagoa izango da. Bereziki, agintariek horrela eskatu dutelako. Baina bide segurtasuna bermatu beharra dago, bereziki txirrindulariak gogoan hartuta.
Goizean Kaletxikin aurkitu dugu Barberena, Kaletxikiko irteera baita arrisku gune posibleetako bat. Goikoplazan tarteko helmuga ipini dute, eta maldan behera abiadura hartuko dute. Ama Kandida kongregazioaren etxe ondoan bidea estutu egiten da, eta metro gutxira biribilgunea dator. Txirrindularien begietara oso argi geratu behar du bidea estutu egiten dela, eta Urnieta aldera joan behar dutela. Tropelean joanda, txirrindulariek informazio hori azkar batean barneratu behar dute, eta horretarako garrantzia handikoa da goizean zehar egiten ari diren lana.
Barberenak denbora tarte txikian 35 laguneko koadrilla elkartu du udalerrian barrena bide segurtasuna bermatzeko. Eta inguruko udalerri askorekin harremanetan izan da, eskatu dizkion orori aholkuak eta gomendioak emateko.
Itzulia eskualdean barrena igarotzea gauza ederra da, ederragoa udalerriko kaleetatik igarotzen denean. Gauzak ondo egin behar dira, arriskuak ahalik eta gehien murrizteko. Errepidea igarotzen den unean alerta piztuko da Kaletxikiko alde horretan.
Kezka du Barberenak, Urnietako Idiazabal kalean Zaldundegi parean dauden bolardoekin. Txirrindulariek ez dituzte horrelakoak batere maite. Erritmo bizian joanez gero, arrisku handikoa izan daiteke.
Eguerdirako, ordea, Idiazabal kaleko bolardoak kendu egin dituzte. Bideoan, ikusgai:
Eskualdean barrena igaro arte, lasterketa eurek antolatutakoa balitz bezala biziko dute Barberenak eta bere lankideek. Bere txikitasunean, Andoaingo eskolaren eta herrietako eragile askoren lana handia da. Handia, eta ezinbestekoa.