Aitziber Ugartemendia
Pirritx, Porrotx eta Marimototsen postuan igaro zuen eguna atzo. Esan zigunez, pailasoek, besteak beste, Miren Amuriza bertsolariak eta Xabier Zabala musikariak sortu duten Kuikui ipuin eta disko liburua eraman dute Durangora aurten, eta oraingoz bera da arrakastarik handiena eragiten ari dena pailasoen jarraitzaile diren txikien artean.
Alex Tello
Su Ta Gar musika taldearen postuan bertako produktuak saltzeaz gain, horietako zenbait sinatzea ere egokitu zitzaion atzo. Izan ere, Julen Rivasek eta biek "Sua" komikia plazaratu baitute,; batek ilustrazioak egin ditu lehenak, gidoia bigarrenak. Tellok liburuaren hitzaurrean aitortzen duenez, Eibarko talde heavyak Andoaingo Arrate frontoiko azpialdean eman zuen kontzertu batean ezagutu zuen, 12 urte besterik ez zituenean.
Koldo Otamendi
Diskoak eta liburuak saltzen egin zuen eguna Azokan, Euskal Herriko musikaren agerkari digitala den "Musika Zuzenean"ek zabaldu duen postuan. Tarteka, saltokia utzi eta Hamaika telebistarako elkarrizketak egiten aritu zen.