Buruntzaldeako Kontseilu Sozialistak, “errepresioa egungo gizarte-eredua mantentzeko ezinbesteko bitartekotzat jo du, proletalgoarentzat eta gizarte-eredu hau irauli nahi duen ororentzat eguneroko ogia” dela adieraztearekin batera. Zentzu horretan, espetxea “sistema kapitalistak duen errepresio-forma krudelenetarikoa” bezala definitu dute, eta “instituzio honekin amaitzeko hautuan” berretsi dira. Era berean, iaz egin moduan, amnistiaren aldarrian berrestea erabaki dute, “garaipen politikoa erdigunean ezartzen baitu” xede.
Abenduaren 24an eta urtarrilaren 4an hitzorduak
Abenduaren 24an, arratsaldeko 17:30tan, Zumea plazan elkarretaratzea egingo da. Iragan urtean bezalaxe, amnistia aldarrikatzea izango dute helburu.
Bestetik, urtarrilaren 4an solasaldi bat antolatu dute Zigor Garro preso politiko ohiarekin. Urigain Kultur Etxean egingo den solasaldian, gonbidatu oreretarraren bizipenak jasoko dira, espetxearen gaineko hausnarketetara bultzatzeko.