Aiurriren Instagrama bilakatu da gazteen artean informatzeko biderik eraginkorrena. Eguneko albisteen eta ekitaldien berri emateko bide bilakatu da, horiek horrela, pandemiaz geroztik 1.500 jarraitzailetik gora lortu ditu Aiurrik. Gainera, herritarren eta Aiurriren arteko harremana indartzeko ere balio izan du, izan ere, bien arteko hartu emana nabarmen igo eta hobetu da. Datozen hilabeteetan 3.000 jarraitzaileetara iristea espero da, herritarren informazio iturri izango denaren seinale. Publikazio kopurua, batez beste, eguneko bizpahirukoa da eta askotariko gaiak jorratzen dira; besteak beste, kirola, kultura, gertakariak, sariketak eta elkarrizketak, beste batzuen artean.
Hori guztia gutxi balitz, ikus-entzunezkoa sustatzeko beste bide bat martxan jarri berri du Aiurrik: TikTok sare soziala. Duela hilabete eta erdi martxan jarrita, ia 300 jarraitzaile eskuratu ditu; tartean 60.000 ikustalditik gorako bideo bat. Kultura eta gertakariak oinarri, bideo edukiak zabaltzea du xede Aiurrik, egun erakarpen handia duen formatuak erabilita. Guztira, 7.600 gustukotik gora lortu ditu. Azpimarratu beharra dago, euskara sustatzeko tresna interesgarria bilakatu dela; edukia zabaltzeko erraztasunak, euskara txoko guztietatik barreiatzeko balio duelako.