Harrera honen arrazoiak hurrengoak dira:
- Haurrak basamortuko udako baldintza gogorretatik aldentzea.
- Haurren osasuna hobetu elikadura orekatu baten bitartez.
- Oinarrizko osasun azterketak egin.
- Haur sahararrek kanpamentuetakoa ez den beste errealitate bat ezagutzea.
- Mendebaldeko Sahara eta Herri Sahararraren egoeraren bueltan euskal herritarrak sentsibilizatu.
- Gizarte sahararra eta gizarte euskaldunaren arteko harremana sustatu.
Informazio osoa Oporrak bakean webgunean aurki daiteke.
Sentsibilizazio lana Andoainen
Andoainen eta eskualde osoan sentsibilizazio lan handia egiten da. Andoainen, esaterako. Hurria-Sahara elkarteak bertso saioa antolatu ohi du urtero. Sahara, nola ez, hizpide dute.
Colina eta Arzallus, Sahararen aldeko bi boluntario
Gaia: "Sahararen aldeko ekintza solidiario ugari egiten dira herri askotan. Datorren martxoaren 28an, “Ellas por el Sahara” musika jaialdian Madrilen egingo da. Zuek bertan lanean ari diren bi solidario zarete, eta jakin nahi dugu ea nola bizitzen den antolakuntza barnetik".
Sustrai Colina:
Elkartasunak beti asmatzen du
nola borobildu ertzak.
Igurtzia ta auzolana du
bere biziko legetzak.
Saiatzen gara argi daitezen
urrutiko gaba beltzak,
baina ez dakit egiten dugun
guretzat ala eurentzat.
Amets Arzallus:
Gu kausa batek gauzka loturik
zoritxarraren zortean.
Eta Marokok horra zer herri
dadukan bere nortean.
Sala ditzagun errudun oro,
jar ditzagun fokopean,
gatazka ez dadin antzia izan
festaren mozorropean.
Sustrai Colina:
Saiatzen gara baina badakit
neure kabuz zer nezaken.
Jaialdi batek atzean dauzka
asmo adina azalpen.
Ta bitartean Saharan ez al
dugu guztia jazarpen.
Inondik ez da ezer entzuten,
ta inork ez du deus esaten.
Amets Arzallus:
Ixiltasunak agian geuri
egiten digu mesede.
Espainia zen len honen parte
eta haztea du xede.
Europak eta Amerikak e
toki hortan ze botere.
Pentsatzen nago Maroko
ezten
beste guztien titere.
Sustrai Colina:
Edo aspaldi utzi al dion
titere izateari.,
mundu honetan inor ez baita
soilik besterentzat ari.
Nahiz ta indarra ematen zaion
herrien presioari,
ez ote zaio gehiago beitzen
gasaren presioari?
Amets Arzallus:
Ta gasa honuntza Aljeriatik
iristen da azkenean.
Ta Aljeria eta Maroko
elkarren aldamenean.
Eta Sahara mundu hontako
desertu zabalenean.
Baina desertu zabalagoak
Europaren barrenean.
Sustrai Colina:
Munduak dira desertu eta
desertuak dira mundu.
Txikiak beti asmatu behar
du ondokoa lagundu.
Bere aldapak bigundu eta
bere arantzak leundu.
Erakundeek ez dute egingo
guk egiten ez badugu.
Amets Arzallus:
Ta erakundek zer diote, ba,
nork hartzen die usaia.
Gatazka batek gorritzen badu
ingurutako paisaia.
Armen kontrako kondena oro
nondik eta hemendik saia.
Andoainek ere ikutzen baitu
armamentuaren gaia.
Martinen azken agurra
Azken agurreko tartean, hona Alaia Martinek kantatu zuen azken bertsoa:
Mila esker entzule
saioren zati,
gure algara kide
edo muxu zapi.
Ze planeta nahi dugun
aurre erabaki.
Ilargian gabiltza,
beraz, batek daki.
Jarraitu ahoz aho,
lubakiz lubaki,
mikrofonoak jartzen
lur ixildu bati.