Trafikoan eragin nabarmena eragingo duten lanak ostiral honetan hasiko dira, gaueko 21:00tan hasita. Abuztuaren 14rako lanak amaituta egongo direla iragarri du Aldundiak. Mezua argia da, ahal dela ez igaro bertatik: “Asteburu osoan, obrek sor ditzaketen eragozpenak saiheste aldera, A-15 errepidea erabiltzea gomendatzen da Donostiara sartzeko edo bertatik irteteko”.
Xehetasunak, Aldundiaren oharrean agertzen den bezala:
- Abuztuaren 11ko (ostirala) 21:00etatik abuztuaren 14ko (astelehena) 06:00etara galtzada moztuta egongo da zirkulazioarentzat, Gasteizerako noranzkoan, 451,500 eta 451,100 KPen artean. Denbora-tarte horretan, trafikoa lotunearen bide adarretatik desbideratuko da.
- Abuztuaren 11ko (ostirala) 21:00etatik abuztuaren 12ko (larunbata) 06:00etara galtzada itxita egongo da Irunerako noranzkoan, 450,500 eta 451,500 KPen artean. Denbora-tarte horretan, Irunerako noranzkoan doazen ibilgailuek N-I errepidea utzi beharko dute 450 irteera hartuz, eta errepide horretara itzuliko dira Allerruko lotunea (N-I-451) erabilita.
- Bigarren fasean, Irunerako noranzkoan, galtzada ixteko puntua atzera emango da, eta, horrela, abuztuaren 12ko (larunbata) 06:00etatik abuztuaren 14ko (astelehena) 06:00etara galtzada moztuta egongo da 450,900 eta 451,500 KPen artean. Denbora-tarte horretan, trafikoa lotunearen bide adarretatik desbideratuko da.