Irailari ekinda, abian da futbol-denboraldia Urnieta Kirol Elkartearentzat. Hala, denboraldiaurreko prestaketen ostean, lehen neurketak izango dituzte klubeko gorengo taldeek. Besteak beste, Trintxerperen aurka lehiatuko dira gorritxoak, Gorengo Jubenil mailan, igandean, 16:00etan, Trintxerpen (data baieztatzeke dute). Bide beretik, Gorengo Kadeteek etxean jokatuko dute Aretxabaletaren aurka, larunbat honetan, 16:00etan.
Azkenik, Ostadarren aurka jokatuko du Gorengo Erregionalak, Hernanin, igandean, hilaren 17an, 18:15ean. Erronka exijentea du begien aurrean, izan ere, joan den denboraldiaren amaieran igoera eskuratuta, bide berriari hasiera emango dio, kategoria altuago batean. Entrenatzailearen ahotan, sailkapenaren erdialdean gelditzea du xede taldeak, “ekipoa sendotzeko eta belaunaldi aldaketa modu ordenatuan egiteko”. Pablo de Torresek gidatuko du taldea berriro ere, urnietar harrobiaren aldeko apustua eginez. Alboan izango ditu Aratz Urdangarin eta Javi Pastor.
Euskalduna
Andoaingo klubeko hainbat talde ere lehian murgilduko dira, larunbat honetan.
- Ohorezko jubenil mailako taldeak debuta egingo du Ordizian, 17:30ean.
- Gorengo Erregional mailan Euskaldunak Bergara B hartuko du Ubitarten, 18:30ean hasita.