Txotx denboraldia 2024

Euskal Sagardoa, sor-marka Euskal Herri osoan

Aiurri 2024ko urt. 19a, 15:16
Iturria: Gaur goizean izandako hitzartzea.

Albiste berri batekin hasi du urtea Euskal Sagardoa Jatorri Deiturak, bere ibilbideak ia zazpi urte beteko dituenean: Zuberoako, Behe Nafarroako eta Lapurdiko sagar-biltzaileek nahiz sagardogileek konpromisoa azaldu dute Jatorri Izendapeneko kide izateko. Izan ere, izena partekatzen dute eta baita sagardoa bera ere. Pirinioetako bi aldeetako sektoreak proposamen bat lantzen aritu dira azken hilabeteetan, INAO (Frantziako Jatorri eta Kalitatearen Institutu Nazionala) eta HAZI-ko teknikarien laguntzarekin eta Eusko Jaurlaritzaren eta Euskal Herria Hirigune Elkargoaren koordinazioarekin eta babesarekin. Hori horrela, aurrerantzean, Euskal Sagardoa/Sidra del País Vasco, Cidre du País Basque/Euskal Sagarnoa izango da Mugazgaindiko Jatorri Deituraren izena. Bruselako oniritzia jaso ostean, Nafarroako sektorea gehituko da egitasmora.

Horren guztiaren berri emateko, Donostiako Eusko Jaurlaritzaren delegaritzan bildu dira gaur agerraldia egiteko, besteak beste: Arantxa Tapia Eusko Jaurlaritzako  Ekonomiaren Garapen, Jasangarritasun eta Ingurumen sailburua, Joseba Erramundegi Euskal Elkargoko Mugaz Gaindiko Europako eta Nazioarteko kontseilaria, Jose Mari Aierdi Nafarroako Gobernuko Landa Garapen eta Ingurumen kontseilaria, Unai Agirre Euskal Sagardoa jatorri izenaren zuzendaria eta Bixintxo Aphaulek Domaine Bordattoko sagardogilea.

Elkarlana eta batura

“Produktuari eta ekoizleari zor diegu”, adierazi du Unai Agirrek prentsa-agerraldian. Hiru esparrutan eman dira aldaketak. Lehenik, lurraldetasunean, zeren Gipuzkoari, Bizkaiari eta Arabari, Lapurdi, Behe Nafarroa eta Zuberoa batuko baitzaizkie. Bigarrenik, sagar-motei dagokionez, 106tik 200 sagar mota izatera igaroko dira. Eta, azkenik, sagardoak ere definitu egin behar izan dituzte, nahiz eta iturburu berekoak izan. 

Gaur egun, 50 sagardotegi daude Euskal Sagardoaren barruan. Hala mugaz gaindiko hitzarmenarekin, eta, aurrera begira, Nafarroa gehituta, 80 sagardotegitan ekoitziko litzateke Euskal Sagardoa. 

Zer emango die Jatorri Izendapenak eragile guztiei? “Lanerako erreminta” dela aitortu du Agirrek, ahalegina “balorean” jartzen duelako eta “posizionamentua” ematen diolako produktuari: “Bakarrik baino askoz hobeto goaz guztiok elkarrekin”. 

Bat dator baieztapenarekin Aphaule, Iparraldeko hiru lurraldeen izenean: gaur egun, Ipar Euskal Herrian, zortzi sagardogile eta 50 bat sagar-ekoizle daude. “Lan honek gure sagarren jatorria, berezitasuna eta aniztasuna baloratzeko aukera emanen digu”, azaldu du, "mugaz gaindiko kalitatezko ikur baten bidez: Euskal Sagardoa sor-marka". Aitorpen horri esker, euskal sagardoa etxean eta nazioartean "balorizatu" egingo denaren iritzi da sagardogilea, "jatorri eta ekoizpen-baldintzen kontrola eta babesa" bermatuta. 

 

 

Artikulu osoa, datorren asteko zenbakian, irakurgai

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!