Proiektuaren arrakasta ikusita, aurten, urrats bat gehiago eman dute, eta 17 herritara zabalduko da erremontea. Honatx proiektua babestu eta bultzatu nahi izan duten herriak: Aizarnazabal, Bergara, Urnieta, Lekunberri, Andoain, Hondarribia, Ordizia, Altsasu, Pasaia, Zumarraga, Amasa-Villabona, Hernani, Beasain, Arrasate, Zestoa, Errenteria eta Zumaia.
Aurtengoan, herri bakoitzak bere egutegira egokituko du Erremontari Herriz Herri jaialdia, festa garaian edo herriko ekintza bereziren batean. Oriamendi enpresaren helburu nagusia erremontea zabaltzea eta jendearengana hurbiltzea izanik, jaialdiak doakoak izango dira, ezagutza prozesua errazteko asmoarekin.
Jaialdi bakoitzean bi partida jokatuko dira, set formatuan. Gainera, Oriamendik herri bakoitzarekin elkarlanean, diseinu bereizgarriak eta pertsonalizatuak sortuko ditu, komunikazioa hobetzeko.
Aurkezpenean izan dira erremontariak, 17 udaletako ordezkariak, ETBko Joseba Urkiola kirol zuzendaria, Azahara Dominguez Aldundiko Mugikortasuneko, Turismoko eta Lurralde antolaketako diputatua, Iñigo Garcia Turismo Zuzendaria eta Oriamendiko Xabi González gerentea.