Boto gehien jaso duten obrak:
PLEIBAK - Miren Amuriza.
GIZON BARREGARRIAK - Joxean Agirre.
FRANCESCO PASQUALEREN BOSGARREN ARIMA - Unai Elorriaga.
HETERO - Uxue Alberdi.
COCA-COLA BAT ZUREKIN - Beñat Sarasola.
Euskal Literaturazaleen 111 Akademiak amaitutzat eman du 2024. urteko Akademiaren Saria ebazteko hiru bozketa txandetako lehenengoa. Akademia osatzen duten 218 akademiakideek martxoaren 28ra arte aukera izan dute 2024. urtean argitara emandako literatura lanen uzta osoan “gogokoen” gertatu zaienaren aldeko botoa emateko.
Esan bezala, lehenengo bozketa txanda horretan, akademiakideek 2024. urtean argitara emandako literatura obra guztien gaineko botoa eman ahal izan dute, alegia, 2024. urte osoan euskaraz argitara emandako literatura lanak proposatu ahal izan dituzte sarirako. Emandako boto guztien artean, baina, ez da obrarik gailendu botoen % 40tik gorakoarekin, eta, beraz, botorik gehien jaso duten bost obrak hautatu dira bigarren bozketa txandara igarotzeko.
Horrenbestez, saria hautatzeko bigarren bozketa txanda zabalik da, apirilaren 27ra arte. Bigarren bozketa txanda horretan akademiakideek goiko bost obra horietakoren baten alde egin beharko dute, edota boto zuria eman. Lanen batek lortuko balu emandako botoen arteko % 40a gainditzea, automatikoki hari emango litzaioke saria. Bestela, hirugarren bozketa txanda zabalduko litzateke gehien bozkaturiko bi obrekin.
111 Akademiak aurreikusten duenaren arabera, 2024ko Akademiaren Saria maiatzaren azken egunetan emango luke ezagutzera –hiru bozketa txandak egingo balira– eta irabazleak saria eskuratzeko ekitaldia ekainaren 5ean izan liteke, ostegunarekin.
Etorkizuna, airean
Aurten ohi baino geroago jarri du 111 Akademiak bozketa bidea martxan eta, horrenbestez, ohi baino hilabete geroago amaituko du. Horren arrazoia azaldu beharra ezinbesteko jotzen du Akademiak: hogeita zortzi urteko ibilbidearen ostean zailtasun handiak dauzka une honetan 111 Akademiak aurrera jotzeko. Joan den urrian, 18 urtez eragile izan den Amaia Goikoetxea teknikariak utzi egin zituen Akademiako bere lan eta ardurak lan- baldintza duin eta txukunagoko lanpostua hartzeko eta, geroztik, zailtasun handiak dauzka Akademiak bere ordez arituko dena kontratatzeko. Hori gutxi balitz, finantzaketa arazo berriak dauzka bere lan-egitaraua gauzatu eta burutu ahal izateko.
Jon Unanue akademiaburuak adierazi duenez, “28 urteren ostean ez dugu lortu euskal literaturari eta irakurzaletasunari bideraturiko egitasmo honek erakundeen aldetik behar besteko babesik jasotzea. Azken urteetan 111 Akademiaren lan-egitaraua gauzatzeko zortzi dirulaguntza ezberdin kudeatu behar izan ditugu, zortzi, eta horrek lan izugarria eman dio teknikariari, beste eginkizun batzuk guztiz eragotziz. Oraintxe bertan, azken hiru urteetan jasotako bi dirulaguntzekin 2025ean arazoak eduki ditzakegula esan digute... Ezinezkoa da horrela lan egitea eta ezinezkoa 28 urtez eutsi diogun ahalegin handi honi jarraia ematea”.
Beraz, aurten, uda aurretik, Manuel Larramendi Kultur Bazkunak erabaki egin beharko du 111 Akademiarekin aurrera egingo duen ala ez, behin 2024. urteko saria banatuta, amaitutzat emango duen bere ekimena. Bien bitartean, baina, akademiakideei ahalegin berezia eskatu zaie 2024. urteko saria erabakitzeko bidean ohi bezala parte har dezaten.