Goizari hasiera emateko, beteranoen erakustaldia izan da ikusgai. Eguerdiko 12:00etarako zegoen iragarrita eta, ordurako, beroketa lanak egiten ari ziren Jose Antonio Matxain, Juan Manuel Erasun eta Leon Albeniz 'Iruntxiberri'. Ikuskizun ederra eskaini dute hiruek. Hogeita bost metro karratuko saila ebaki du 87 urte dituen Leon Albenizek. 50 metrokoan aritu da Matxain, eta 100 metroko saila ebaki du Juan Manuel Erasunek. Txalo eta animo artean aritu dira hiruak ere, segan abilak direla erakutsiz.
Jarraian eman diote hasiera txapelketari. Julen Gabirondo, Mikel Lizartza eta Jon Larrañaga ziren aurrez aurre. Mila metroko saila ebakitzea zen helburu, ahalik eta azkarren eta txukunen eginaz. Hasiera nahiko parekatua izan da Julen Gabirondo eta Mikel Lizartzaren artean. Hirugarren sailetik aurrera, ordea, abantaila nabarmena hartu du urnietarrak eta hark eraman du garaipena.
Jon Larrañaga oiartzuarra sailkatu da hirugarren postuan. Leon Albeniz, 'Iruntxiberri' izan du aldamenean, laguntzaile.
