Frantziako Tourraz gozatzen ari gara, egunotan eta, laster, goi mailako txirrindulariak eskualdean barrena ikusiko ditugu. Abuztuaren 2an izango da Donostiako Klasikaren edizio berria, eta tartean izango dira Frantziako Tourrean nabarmendu diren hainbat tropelkide.
211,4 kilometrokoa izango da lasterketa eta, ibilbidean, sei mendate igo beharko dituzte. Aurten, goizeko 11:00tan Añorgatik abiatu eta Hernani aldera joko dute. Gauzak horrela, minutu gutxira Urnietan, Andoainen eta Aiztondon barrena igaroko dira. Andazarrate, Urraki eta Alkiza igo ostean Aduna aldetik iritsiko dira berriro Andoainera. Eta, handik, Urnietara. Bigarren igaroaldia 14:30ak aldera izango da. Azken txanpan Jaizkibel, Erlaitz eta Murgil igo beharko dituzte Donostiako Boulevardera iritsi aurretik. Arratsaldeko 17:00etarako proba amaitzea espero da.
Iaz, UAEko Marc Hirschi gailendu zen. Gertu izan zituen Julian Alaphilippe eta Lennert Van Letvelt. Talderik onena UAE Team Emirates izan zen.