Hilaren amaieran ekingo zaio Bizkaiko Txapelketari, hain zuzen, irailaren 28an emango diote hasiera Urdulizen lehen faseko lehen saioari. Bada, astebetera, urriaren 4an, bide berari eutsiko dio Nafarroako Txapelketak, urriaren 4an, Auritzen izango den lehen saioarekin. Hala, eskutik helduta egingo dute urte amaierarako bidea biek ala biek: Nafarroako Txapelketako finala azaroaren 29an izango da, lehendabizikoz, Nafarroa Arenan. "Bertsolaritza Nafarroan izaten ari den gorakadaren ondorioz, saltoa egitea erabaki da", azaldu du antolakuntzak, "horren isla da urtez urte txapelketa eskaintzen ari den kalitatea, eta geroz eta ikusle gehiagok jarraitzea". Bizkaiko Txapelketaren kasuan ere tokiz aldatzea erabaki dute, Bilbao Arenatik La Casillara egingo du jauzi finalak eta aurtengo abenduaren 20an jokatuko da.
Hori horrela, Xilaba izango da hurrengoa txapelketaren lekukoa hartzen, Aiherran lur hartuko baitu lehen faseak abenduaren 6an . 2026aren hasieran izango da finala, urtarrilaren 31n, Donibane Lohizuneko Jai Alai pilotalekuan.
Azkenik, Arabak otsailean hasiko du txapelketa, lehen larunbatarekin, eta martxoaren 28an izango da finala, Gasteizko Europa Jauregian.