Aurten, Elordik adierazi bezala, lehen aldiz, AEK osoak "prozesu demokratiko baten bitartez" aukeratu du edizio berriko abestiaren egiletza: "Aurrenekoz, AEK kide guztion artean erabaki dugu noren eskutan jarri Korrikaren kanta". Hala, begirune osoz zuendu zaio arduraduna Arbizuko musikariari: “Eskerrik asko Korrikarako kanta zoragarri hau ekoizteagatik eta, are gehiago, musikatik euskarari eta euskal kulturari egiten diezun ekarpenagatik”.
Reparazek hartu dio hitzaren lekukoa gero, haren ibilbide artistikoan “erantzukizun eta poz handienetako bat" izan dela nabarmentzeko: “Ez da enkargu hutsa: kantaren bidez euskarak eta Korrikak niri eman didatenaren zati bat itzultzea da”. "Ereserki zurrun" bat izatetik urruti, "mugimenduan dagoen komunitate baten sonoritatea" ematen ahalegindu da Reparaz, entzuten duenak "koru honen parte" sentitzeko xedez. Jendarteari euskarara hurbiltzeko gonbita luzatu nahi izan du abestiarekin: "Ez gara soilik hizkuntzaz ari, bizitzeko, elkar zaintzeko eta etorkizun duinago bat elkarrekin irudikatzeko modu bati buruz ari gara".