175 txirrindulari ariko dira aurtengo Aiztondo Klasikan. Afizionatu mailako proba da, eta Espainiako Koparako baliagarria.
Ibilbidea
Irteera Alkizan izango da 10:00etan, eta helmuga Larraulen jarriko dute, 13:30 inguruan. Hasiera neutralizatua Alkizan egingo dute, Asteasuraino. Ondoren, bailarako ohiko itzulia —Asteasu, Zizurkil, Aduna, Villabona, Zizurkil eta berriz Asteasu— hiru aldiz osatuko dute.
Jarraian, Alkizako igoera egingo dute: Anoetatik Axibar gainera igo, eta Sarasola sagardotegiko bidetik itzuliko dira Asteasura. Igoera hori amaituta, bailarako itzuliari beste bi bira emango dizkiote.
Azken zatian, berriz, beste bi itzuli egingo dituzte Muga Ranch igoera txertatuta, Villabonatik Fraisorotik barrena. Bigarrenean, Axibartik Sarasola sagardotegiko bidetik Larraulera joko dute, eta han egongo da helmuga.
Trafikoa
Mozketak puntualak izango dira, txirrindulariak igarotzean bakarrik. Antolatzaileek zehaztu dutenez, errepideak ez dira erabat itxita egongo; lasterketaren igarobidearekin batera egingo dira etenaldi laburrak.
Larraulgo aparkalekuak
Larraulen aparkalekuetan izango du eragina lasterketak. Hainbat gunetan aparkatzea debekatuko dute ostiraletik larunbatera bitartean, eta larunbatean bertan ere murrizketak izango dira; antolakuntzak pilotalekua egokitu du aparkatzeko gune gisa.
