Tolosako Hizkuntza Eskola Ofizialak (HEO) zabaldu du ikasturte berrirako ikasleak onartzeko eta matrikulatzeko epea. Hizkuntzak ikasi edo egiaztatu nahi dituzten herritarrek irailaren 1etik 16ra bitartean (biak barne) egin ahal izango dute eskaera.
Eskaera-prozesua telematikoki egin beharko da Eusko Jaurlaritzako Ikasgunea atariaren bidez. Horretarako, ezinbestekoa da plataforman erregistratuta egotea eta adin nagusikoa izatea (adingabeen kasuan, guraso edo tutore legezkoak egin beharko du eskaera).
Matrikulazio-tramiteak errazteko eta aurrez aurreko laguntza eskaintzeko, Tolosako HEOko idazkaritza irekita egongo da arratsaldez ere irailaren 2an, 4an, 10ean eta 15ean.
Hizkuntza eskaintzari dagokionez, Tolosako zentroak hainbat mailatako ikastaroak eskainiko ditu ikasturte honetan:
Ingelesa: A1etik C1 mailara arte.
Frantsesa: A1etik B2.2 mailara arte.
Espainiera: A1 eta A2 mailak (berrikuntza gisa).
Aurrez aurreko klaseez gain, ikastaro erdipresentzialak eta mailaketa-probak ere eskaintzen ditu ikastetxeak, ikasle bakoitzaren beharretara egokitutako ikaskuntza bermatuz. Ikastaro guztietan ikasturte osoak 72,36€ balio du.