Azken urteetan bezala, Amasa-Villabonako udalak 70.000 euroko partida ekonomikoa ezarri du 2022ko udal aurrekontuetan Haur Hezkuntzako eta Lehen Hezkuntzako eskola publikoko (Fleming Herri Eskolako) instalazioetan hobekuntza inbertsioak egiteko.
Udal gobernuak Fleming Herri Eskolako zuzendaritzarekin adostu du aurten egingo diren hobekuntza lanen edo proiektuen zerrenda:
- Arratzaingo eraikin zaharreko atzeko patioa estaltzea.
- Arroako eskolako eraikinaren fatxada margotzea.
- Arratzainen geratzen diren leiho zaharrak kendu eta berriekin ordezkatzea.
- Arratzaingo eraikin zaharreko teilatuan inpermeabilizazio lanak egitea.
- Arroako eraikineko estalki zaharraren gainaldea inpermeabilizatzea.
- Bost proiektu hauen aurrekontua, guztira 107.651,28 eurokoa da.
Proiektu hauen inguruko dokumentazio teknikoa prestatuta, udalak eskaerak bideratu zituen eskola publikoetan inbertsioak egiteko "Udalaguntza2022" Eusko Jaurlaritzako Hezkuntza Sailak ezartzen duen dirulaguntza lerrora. Dirulaguntza honekin, egin beharreko inbertsioaren %60a finantzatzen du Hezkuntza Sailak, geratzen den gastuaren %40a udalak egin beharko duelarik.
Otsailean argitaratu zen "Udalaguntza2022" dirulaguntzen ebazpenean, Hezkuntza Sailak, Amasa-Villabonako udalak eskatutako dirulaguntza guztiak onartu zituen eta guztira 79.352,77 euroko dirulaguntza bideratu zaio udalari (107.651,28 euroren %60a).
Gagoeneko diru hori udalaren eskuetan dago eta udaleko Hirigintza saila inbertsio guzti hauek prestatzen ari da. Aste santuetako oporraldian leihoen aldaketak eta bi inpermeabilizazio lanak egitea, eta ondoren uda garaian Arratzaingo patioa estaltzeko lanak eta Arroako eskolako fatxadaren margoketa egitea da udalaren helburua.
Udal gobernuak bere poza adierazi nahi du, Eusko Jaurlaritzak eskaintzen dituen dirulaguntza hauek lortu izanagatik eta Hirigintza saileko teknikariak zoriondu nahi ditu egindako lan bikainagatik. Amaitzeko, udal gobernua urtero eskola publikoetako instalakuntzak hobetzeko inbertsioak egiten jarraitzeko konpromisoan berresten da.