Udalak, Euskal Fondoarekin lankidetzan, 16.230,11 euro bideratuko ditu garapenerako nazioarteko proiektuak finantzatzera. Euskal Fondoak euskal udalerrien laguntza bideratzen du garapen bidean diren herrialdeetako elkartasun egitasmoetara.
2025erako Amasa-Villabonaren ekarpena bi proiektu hauetara bideratuko da zehazki:
1. El Salvadorreko Segundo Montes komunitateko Meanguera barrutiko Soledad auzoan edateko ura sartzeko proiektuaren lehenengo faseko lanak egiteko: 10.874,17 euro.
Proiektu honen helburua Soledad kantoiko biztanleek edateko ura izatea da, kalitate eta kantitate baldintza egokietan. Horretarako ur-sistema berri bat eraikiko da, 132 familia kalitatezko edateko urez hornituz. Proiektu honekin 506 pertsonak ( % 57 emakumeak eta % 43 gizonak) edateko ura bermatuta edukiko dute eta beraien bizi-kalitatea nabarmenki hobetuko da.
2. Mendebaldeko Saharan, Marokoko indar okupatzaileen zigorgabetasuna salatzeko eta giza eskubideen defentsarako: 5.355,94 euro. Egitasmo honekin, arlo humanitarioan Sahara eta Euskal Herriaren arteko elkartasunaren eraginkortasuna hobetu nahi da, giza eskubideen egoera eta urraketak behatuko dira, sentsibilizazio-jarduerak antolatuko dira, etab.
Onartutako lankidetza-hitzarmen honen bidez, Udalak bereziki El Salvador eta Mendebaldeko Saharako lurraldeekin duen elkartasun-harremanetan sakonduko du. Izan ere, Amasa-Villabona, gerra, zapalkuntza, okupazioa, giza eskubideen urraketa eta bizi baldintza oso gogorrak pairatzen dituzten bi herrialde hauetako komunitateekin senidetuta dago. Udalarentzat nazioarteko elkartasun-politikekin eta garapenerako lankidetzarekin duen konpromisoari eustea funtsezkoa da.