Borroka erabakigarriaren atariko lasaialdia izan da gaurko etapa. Hurrengo hiru saioek erabakiko dute garailea, eta oilarrek lasai hartu dute 200 kilometroko etapa. Aukerarik ez zeukan ihesaldia egon da, eta volata. Eta volatan ezustekoa, DSM taldeko Alberto Dainese nagusitu baita azken gerri kolpean. Jonathan Milan menderatu du justu-justu, baita azken esprinta luzexka egin zaion Michael Matthews ere.
Bihar lehen round-a, Coi gainean bukatuko den 165 kilometroko etapa. Gogorra, 3.700 metroko desnibel metatua baitu. Lehen mailako bi mendate, bigarren mailako beste bi eta laugarren mailako bakarra. 10 km. ditu %9tik gorako batez besteko aldaparekin, eta ezusteko gehiago ikus ditzakegu.