Santakrutzak gogoan 2021

Hain gertu eta hain urrun

Erabiltzailearen aurpegia
2017ko gaupaseroen argazkia. AIURRI

Santakrutz jaien atarian gaude. Parranda egiteko eta sozializatzeko gogoa nabari da giroan. Normala da. Bigarren urtez, ez da egonen erreka jaitsierarik, ez kuadrilla egunik, ez kontzerturik, ezta txosnagunerik ere.

Urteko egunik gogoangarrienak izan ohi ziren; kuadrilla guztietan sortzen ziren pasadizoak eta lagunartean soilik kontatzen ziren bitxikeriak. Bada, beste urtebetez ezingo dugu lagunartean normaltasunez elkartu, Bekoplazako lupetzean urte osoan gordetako oinetako zaharrak zikindu, tabernaz taberna igaro, gaupasaz Tahonara gosaltzera joan edota txosnak itxi baino lehen Flying Free abestu. Datorren urtean, euria ez egiteko desiatu beharrean, musukorik gabe lagunartean ibiltzeko nahia azalduko dugu.

Ez kezkatu, hurrengo urtea normaltasunera itzultzeko urtea izango da. Berriro ere elkartzeko, bazkaltzeko, afaltzeko eta bidaiatzeko urtea. Gutxinaka aurrera goaz, oso astiro, baina bagoaz. Goikoek hitzemandakoa betetzen dutenean, berriro ere ametsetako Santakrutzak ospatuko ditugu. Behar den bezala. Bitartean, sare sozialetan urteak atzera argitaratutako argazkiekin konformatu beharko dugu, oraingoz. Hortaz, esan dezakedan gauza bakarra, zera da… Animo eta eutsi horri!

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!