Txistulariak betidanik izan dira Urnietan, baina azken hamarkadatan bada txistulari bat belaunaldi ezberdinen artean giltzarri bilakatu dena. Eta horixe Juxto Egaña da. Egape ikastolan hainbat ikasle trebatu zituen, Urnietako txistularien harrobi bilakatuz. Talde txikia zena handituz joan zen eta, egun, Txanbolin elkartea osatu dute.
Ekitaldi berean, Jose Inazio Ansorenak sortu eta Joxe Mari Oiartzabalek moldatu dituen bost doinu estreinatu zituzten. Urnietako ikasteetxeetako ikasleek eta Urdanor elkarteetako kideek pieza guztiak jo zituzten plazan. Hurrengo urtetik aurrera horiek Urnietan egiten diren danborraden errepertorioko zati izango dira.
Doinuak Ansorenak 2003an konposatu zituen eta Urnietari eskaini zizkion, bere amona Zalzate baserrikoa zela oroituz.