Bizkar eskola Urnietan, Saioa Audikanaren eskutik
Bizkarreko min edo patologiaren bat duen ororentzat zuzendutako eskola da. Saioa Audikana andoaindarrak fisioterapia zentroa du Andoainen bertan. Urnietako bizkar eskolako dinamizatzaile lanetan arituko da bigarren urtez jarraian.
Saroben bizkarrari zuzendutako ariketak egiteaz gain, gorputzeko gihar eta artikulazio guztien oreka bilatu nahi dute. Saioaren hitzetan, ikasturtean zehar “ez dituzte beraien arazoak konponduko edo lesioak sendatuko, baina lesioak hobeto eramaten lagundu nahi diegu”.
Bizkar eskolaren onurak
Bizkar eskolak izan ditzakeen onuren gainean ere hitz egin du irakasleak. Malgutasuna da aipatu duen lehen hitza, lesioen ondorioz gainkarga muskular handiarekin etortzen baitira asko eta bertan egiten diren ariketek gainkarga hori murrizten laguntzen baitute. Egiten dituzten ariketekin minak gutxitzea eta egunerokotasunean egiten diren ekintza ezberdinetan arinago sentitzea bilatu nahi dute.
Bizkar eskola Urnietan ez da berria: “Iaz talde batekin hasi ginen bizkar eskola ematen eta taldea anitzegia zela ikusirik, guztion onurarako taldea bitan banatu genuen. Talde batean ariketa gogorragoak egin genituen eta beste taldean ariketak egokitu egiten genituen. Aurten ere izena ematen dutenen arazoen arabera bi talde ezberdin egitea pentsatu dugu”. Ate irekiera jardunaldira gerturatu ziren askok ikastaroan izena emateko interesa ere erakutsi zuten.
Gazte Funky Urnietan, Ibone Zarzaren eskutik
Ibone Zarza donostiarra duela bi urte 14 urteko gaztetxoen Funky irakasle lanetan aritu zen Saroben, eta aurten esperientzia errepikatzera dator.
Gazte Funky ikastaroaren dinamika gorputza lantzea eta egiten diren dantzen bidez ongi pasatzea da. Modan dauden abestiak hartu eta koreografiak landuz tarte atsegina igaro, kirola egin eta gorputza mugitzean datza.
Dantza egiteaz gain, joko ezberdinak ere egiten dituzte klaseak dinamikoagoak izan daitezen. Hala ere, Ibonek argi du zein den bere helburu nagusia: “Dantzatzea gustuko duten gaztetxoei Funky-az gozatzen erakutsi nahi diet. Badakit ikastarora gerturatzen diren guztiak ez datozela motibazio berdinarekin, baina guztientzat baliagarri diren klaseak egiten saiatzen naiz”.
Ikastaroan zehar dantza ezberdinak landu eta ikasitako guztiarekin ikasturte amaierako jaialdia osatzen dute. “Lau urterekin hasi nintzen eta haurrek, pixkanaka, nola ikasten duten ikustea eta gainera zu horren parte zarela sentitzea ikaragarria da”.
Tarte atsegina igarotzea, ezinbestekoa ikastaroan
Adinari dagokionez, zortzi urtetik hemezortzi urte bitarteko gazteek parte har dezakete ikastaroan. Gazte Funkyko saioetan ongi pasatzea ezinbestekoa da. Iboneren hitzetan, “primeran pasatzen dugu klasean, ondo pasatzera eta disfrutatzera gatozelako. Bakoitza bere buruarekin ondo sentitu eta bakoitzak bere erritmoa eramatera gatoz”.