Nonbait, Puigdemontek Belgikako txokolate erreserba guztiak jan ditu, eta handik kanporatu egin dute horrexegatik. Presidenta udaletxera igo da, erreginekin batera. Balkoira atera, eta bertatik adierazi du Kataluniakoa ez doala aurrera, eta berak nazio proiektu berri bat behar duela. Horrexegatik, Andoaingo biztanle hungariarrei luzatu die mezua: “Nahikoa da Andoaingo Carrereren erregimen diktatoriala, aske bizitzeko eskubidea daukazue! Gora Hungaria txikia”.
Diskurtsoa amaitu bezain pronto, hor ekin dio euriak goian eta behean! Kaldereroek bakerik ez dute eduki harrezkero. Kale Nagusian behera abiatu dira, eta Ubitarteko armailetan amaitu dute ibilaldia. Euskaldunako jubenilak topatu dituzte zelaian jokoan, Danena taldearen aurka ari zirela. Kaldereroek txarangaren doinu eta zartagien hotsekin giro hotza berotzeaz gain, Euskaldunako jokalariei animoak eman dizkiete, eta horri esker, bi gol bata bestearen segidan sartu dituzte.